صهيب المحمداوي 

 ايهاب المالكي

قصيدة: انا من الجرح ياصاحبي اتعافيت


اني من الجرح ياصاحبي تعافيت
عبرتني المنيه ويومها تبدل
لكطت السنين ولحكت ع الضال
رحيت المصوفر كبل لايذبل
تانيت امنياتي الما منعسة تنام
حتى اكدر بسكته من القيود افتل
عفت بيت ابوذية على العش مكتوب
كلبي بفركة الخلان وجناح
وبديت انحاز للشمات وجناح
صدك خليتني ريشات وجناح
لكن صفك جنحي لما ردت ارحل
صفك جنحي لحد غيمة
عفت ذاك الغصن هيمه
عمر وياك ادور حل
جبيرة السما وين اسال
اخاف اشرد ومااندل
الا ان قررت حسيت عمري الضاع
شفت الطير ثاري من يطير اسهل
اثاري العش عذر للما يعرف يطير
اكول شبي الشامت مايريد ارحل
حركني الظن مثل لعبة الغميضان
وره حايط الشوك بلوعتي اتختل
جنت الخاطرك تحلف بخلكي الناس
انازع واليمر يشوفني مدلل
حكت لاغلاطك بنصين كلبي اعذار
ترفه تغار منها حياكة المغزل
اضوكك بالجفن واستطعمك بالروح
واجمد ابعدك وبهواك انحل
مدينة ظني تشبه دولة افلاطون
شفتك بيها فكره استبعدت تفشل
طيني اتغلب بقوة على نار ابليس
تغلط واني اشوفك بس اكول اغفل
واتلمس جفونك لمسة المكفوف
اريد الكالي دمعه لو جفن مبتل
واتركك واسمع بعزتك تصهل خيل
خطوة تكلك امشي خطوة لاتنذل
وانه غيمة برد مابيها بس فياي
انطي الشمس ظهري وانجوي اتحمل
مرات اختنك لمن يجيني الليل
افك شباك صدك واوكف اتأمل
صياد احس روحي والنهر وشل
اشوفك جاي ليه واركض اتخيل
اوصل للنهاية وابتدي من الاول
اذا رفضت ظنوني جيتك ع البال
اغافلهن واكلك ماعليك اقبل
اغافلهن مغافل روج بالراس
اعلى نيتي وثاري طبع الذيب بالراس
العكل شيفيدني ومتروك بالراس
ول كلبي ليه الراي والشور والحل
يومن بدونك كنت اكظيه مكسور
تبطي الدقايق فيه والوكت يثكل
روحي بجنبك مثلت شاهد الزور
والحك من صوبي لصوبك تحول
كنت ارتجيك تكون في ظلمتني نور
وليلي في روحي بالبعاد طول
لما تركتك صاحلي الشوك معذور
والحب من مهر الاماني ترجل
عفتك بس احس مدري شنسيت وياك
واطمئنان روحي والامان اختل
اخاف من الندى والورد مااثق بي
اذا بلبل يغرد نار يمه اشعل
وراك الماي صافي والنجوم احجار
خصر الشمس منه شفت ليل انسل
نسيتك والتعب جف اليفك الباب
احس لوحة بحياتي بفركتك تكمل
وانه وصيت كلبي وكتله كلشي يهون
نوط جروحك على الروح شكله
ياكلبي وسبب ذل الطير شكله
منو يعرف النوم شلون شكله
لان لاشايفه ولامار بيه

  ايهاب المالكي

قصيدة: انتة ابالي احسك وين ماروح


انتة ابالي احسك وين ماروح
واذا وياي تمشي شلون تبعد
شما تلتفت عيني الكاك موجود
ويتراوالي وجهك وين ماصد
اغمض والكى ظلك يمشي بالعين
بحيث من ارد اجيك برمشي تلبد
وانوط عن خيالك واقترب ليك
وتتلاحك روحي تصيرلك سد
حيرة وماعرفت شلون وياك
تصفة ويمشن احساسين بالضد
علية يصول شوكك وانة الاكيك
وعليك خيول ضعفي الجامحة ترد
جرحي وياك ماراويتة للغير
موقصة شماتة وخوف من ند
حلو جرحك واحس تعلقت بيه
واحسب لاتشوفه عيون تحسد
لو كل جرح يشبه جرحك يصير
الا احلف يمين جروح ماشد
اسد بابك بكلبي بغفلة الروح
وتفز مرعوبة روحي تصيح شتسد
انة بحالة تناقض وانقسامات
وصراع وفوضوية وموجد وجد
بحيث انشطر شخصيتين وياك
اكرهك واليحبك يمي يكعد
احط موعد لنسيانك واجي اردود
احط للموعد البيه ننسى موعد
باشد حالات زعلي اتصالح وياك
سماي نجوم بيها وغيم يرعد
واجيك وباعتقادك جابني الثار
وانة من ابعد عليك يجبني الود
اثور بدمعتي ويتراجع الشوك
وطعم شفايفك بالريج يصمد
بعدك وافتهمناه طيفك شبيه
كبل ماسامع انة بطيف يبعد
خفت عن لايمر وجفني مطبوك
كمت حتة من انام عيون ماسد
كانك شارد ودمعات العيون
عليك ابين اليمرون تنشد
ناس هواي اليدخلون بالروح
ولكن محد يظل كلها تشرد
وراك تصير وحشة موت بالروح
بس المايخاف بروحي يكعد
حلو وجه الفرح بس شفتي تكول
تبت وبطلت قمصان ماقد
تسالني منو الوياي بجفاك
على دمعتي لو ع الموت تقصد
اطمأن ماشوف وجهي عيون مابيه
على دربك عيوني متانية ترد
حسبت اطول مسافة لزعلة وياك
خطوة وجنه بيها شوية نبعد
كل مانشمي بيها انفاسنة تضيك
ماتكمل الخطوة للهوى نرد
حجر صدك بماي الواهس يطيح
ثواني ويصفى خلكي وزعلي يركد
تعال الشوك هم بيه فزعة مرات
لهذا على اليموت دموعنة تهد
تعبنة الاصابع خلها ترتاح
كضينة الفركة كلها بيهن نعد
عله سنبل اسراري وباجر يجوز
بيها جفوف اليشمتون تحصد
انة بلياك اقوت ساعة الموت
بس يالحظة اموتن مامحدد..

ايهاب المالكي      ومضات شعرية

سولفلي بعد محتاجك هواي
محتاجك ابكد ما فاركتني
رحت جم يوم عني وتعرف اشصار
عشر سنين يمكن كبرتني




فرق اعيونك اعله الوادم هواي
لذلك لمن اتمر صعبه يمشون
بحيث اتبين انت عيونك كبار
واليمك شلع ما عدهم اعيون



أحبك مو حجاية ابشعري تنكال
أحبك صوت حسره ابين الانفاس
لأن حبك احساس بروحي موجود
وبعد ما لاكي كلمة اتوصف الاحساس





خلل سوه جمالك بالقناعات
الأجمل من جمالك وين نلكاه
بعد حتى الحلو امن انقارنه وياك
يم حسنك انكله (استغفر الله)




هسه انساك ما انساك بعدين
كل مره اني اعذرك صارن هواي
أنه رديت منك شابع جروح
مثل ما يشبع الغركان بالماي





أنه مشتاكلك كد ما إلي جروح
أطيبهن واحس ايفزن عناد
تدري شلون حالي لمن اتروح
مثل حال العراق بلايه بغداد

                         ايهاب المالكي

ايهاب المالكي
قصيدة: ماردت احبك

ماردت احبك حــــــاولت
من لفظة اسمك حاذرت
جلمه وشلتهه من الحجي
من اللسان اخفيــــــــتهه
و بيبان روحي مقــــفله
وعن لا احب سديتـــــهه
صلفه امنــــياتي الرادتك
سئلتني عنك بس صمت ؟؟
كلـــــــــــش ولاحاجيتهه
كالتلي وينه ؟؟وجــاوبت
مادري مادليتـــــــــــــهه
ماردت احس حبـــك لان
كبلك الروح انطيــــــتهه
ولخاطرك رحت اعــــتذر
منيت بيهه لخاطـــــــرك
مثل الطفل ..لمن يمن بحاجته
وياك اعزناسي انتهه ...
وماكمت احس بعازته
أبدربي كلت لو مو سوه ..
امشي حياة بلادرب
يمكن يشح عني الهوه ؟
لابس جذب...
معقولة مانمشي سوه ؟؟
معقولة في لحظة الشمس
للكاع ماتتنطي ضوه ؟؟؟
وتنتهي ومانلكه صبح ؟
معقوله يطلعلي جرح ؟؟؟
معقوله ؟؟
ريشة شفتك ؟؟
ترسملي بالضحكة رمح ؟؟
لا ...موصدك
خلينا من هذا الحجي...
بجفوني سولة عللبجي
وصيادة كاعد بالجفن للدمع شايل فالته
وياي احسك جن صرت مثل الهلال وهالته
كالولك يعوفك تره ؟؟
تذكر كبل ؟؟
كتلي شكلهم ؟؟
كتلك أي.....كلهم لمن من يمي تمشي جنازته
هوانه عايشلك لان ؟
دمي الاعز مابالجسد بس انته تعرف حالته
من مايحس بلمستك
يخلص وتبقى وشالته
تذكر جنت
من تعتنيلي بدمعتك مشتاك حتى تشوفني ؟؟
وتلكاني روح مشككه ولمسات اديك تروفني
تتركني هسه قررت ؟
ينطيك كلبك ننتهي وبس بالاحلام تشوفني
تتركني هيج بلاذنب ؟
بررلي حتى لوجذب 
مليت كلي كمت امل 
شيحمله ليلي بوحدتي 
عندك عذر ..
مليت كلي .....كمت امل
شيحمله ليلي بوحدتي
ماينحمل عدك تره 
وجذبت كتلك ينحمل 
كتلك لمن تمشي تره تتركني وحدي جن طفل 
تايه ..
وكل اهله مشو ..
عايش ايتاني الماأجو...
كلشي اليمر يفززه ...
حتى الشماته اتفززه..
من يمشي ويهب الهوه
يلتفت حسباله حجو
لكن لمن يتذكرك 
حتى الشماته ..
المابجو..
من شافو دموعه بجو
هيج آنه من عني رحت 
ماتسكت جروحي ولودورتك انه بشدتي 
شفتك وطن حنيت الك 
لكن لكيتك غربتي 
احتاريت منهن ياهي اصح 
مابين ذلي وعزتي 
اختاريت اعوفك حتى لا
تكسر قرار دمعتي 
او ونيت سكته ماردت 
يشمتون بونتي 
صح اضحك بنبرة فرح 
بس ركز بصوتي بعد 
تسمع نحيب بضحكتي 
هم مثلي كلبك مانسه 
وهو بعد من تمشي درب 
تذكرني خطواتك بعد ؟
تترك فراغ لخطوتي ؟
لاتسكت ال لا بينت 
بين اثرهه بعبرتي 
ولاتلتفتلي بس ردت 
انطيك اخر مابقى وهوشبقى ؟
مني خذت كلش وبقت 
دمعات ليك بذمتي 

                                   ايهاب المالكي

قصيدة: بلياك ماعيش

بلياك ماعيش اليكلك عشت
بعيوني احلفك منة تاخذ حذر
انة اطمئن يمك واذا تبتعد !
من كلشي يمي انة احس بخطر
الليل يدري شكد احبك لأن
وياك عيني تستلذ بالسهر
اذبل لحد ما ارتوي بشوفتك
جن سنبلة الروح وعشرتك نهر
بلياك كشي يصير مابيه طعم
ماميز ابين الورد والصخر
تمطر ترافة وانة اخضر غزل
وبكاع جفي قلمي يطرح ثمر
لو راد ياخذني القدر كلي الك
بس لابيني وبينك يمر قدر
علمت روحي من زغر شوفتك
ردتك صدق تبقى نقش ع الحجر
تشتاقلك عيني اذا سافرت
مثل النوارس من تحن للبحر
انه شسوي بالنظر لو رحت
من تمشي كلي حتى اضمة النظر
مادور بحبك خسارة وربح
مافكر بقلبي ربح لو خسر
كل اليهمني انة احبك فقط
حب لونة صافي ابيض من الكمر
طير انتة من مر بسمى دنيتي
وكر على روحي وعليها استقر
يسكت غصن خلقي كبل لاتجي
ينتظرك الريح التحرك الشجر
بلياك قلبي يصير مابيه نفع
شيفيد كلي الغيم البلامطر
عين الاشوفك بيها احس تختلف
مونفس عيني البيها اشوف البشر
مرات احجي صورتك ع الورق
من اخلط احساسي وي لون الصور
امشي بحياتي وامعن بخطوتك
حتى من اتيهك ع الاقل الكة اثر
انة من اعوفك جدمي يمشي بثقل
ثقل الجدام المالة من السفر
ومن تمشي عني اكون احس يختنك
والعالم بكبرة احس بيه زغر
بس لمن تردلي ارد اكتشف
كلشي بمكانه وانتة حبك كبر